U lavdëruan dhe e uruan 2 shkurtin, udhëheqësit e Qeverisë dhe Kuvendit, pasi thanë se Kosovën e bënë me Ligj të Pagave, e më të cilin pretendohej se po ndalonin pabarazinë e pagave në Administratën Shtetërore.

Por, Ligji i Pagave ka gjasë të kthehet sërish aty ku u votua, pasi presidenti ka dhënë sinjale se mund të mos e dekretojë atë, raporton KTV.

Rasim Selmanaj është deputeti i AAK-së, i cili mori pjesë në amendamentimin e këtij ligji.

Ky ligj, sipas tij, pavarësisht vërejtjeve të vogla, duhet të dekretohet, pasi ul pabarazinë sociale dhe rrit pagat e shumicës së punëtorëve në sektorin publik.

Vetëvendosje nuk e kishte votuar Ligjin për Pagat, ani pse deputetët e saj konsiderojnë se kanë dhënë kontribut të madh në uljen e diskriminimit brenda administratës shtetërore, për punët e njëjta.

Vetëvendosjes nuk do t’i pengonte kthimi i Ligjit në Kuvend, pasi që beson se ka vend për përmirësim.

Kundër ligjit ka dalë edhe avokati i popullit, Hilmi Jashatri, i cili të enjten në Interaktiv, ka theksuar se kanë marrë me dhjetëra ankesa për shkelje të të drejtave të shërbyesve civilë që, sipas tij, bëjnë punë të njëjta e nuk do të marrin pagë të barabartë.

Mosdekretim të ligjit, presidentit i ka kërkuar edhe Sindikata e Shërbimit Civil të Kosovës, Sindikata e Administratës Publike të Kosovës, e po ashtu, të pakënaqur kanë mbetur Operator Sistemi, Transmisioni dhe Tregu Sh.A.” – KOSTT, Sindikata e Pavarur e Judikaturës së Kosovës si dhe Agjencia e Shërbimeve të Navigacionit Ajror.

Edhe FMN-ja është shprehur e shqetësuar me Ligjin për Pagat, duke e vlerësuar vitin 2020 si problematik, ngase, për shkak të tij, Kosova mundet të futet në një krizë financiare.